​តារាបាល់ទាត់ Cristiano Ronaldo ដែល​ល្បីល្បាញ​ទូទាំង​សកលលោក បានសម្រេច​ចិត្ត​បោះទុន​ប្រមាណ ៤០ លាន​ដុល្លារ​អាមេរិក ទៅក្នុង​គម្រោង​សាង់សង់​សណ្ឋាគារ​ប៉ូ​ទិ​ក​ចំនួន ៤ ដែលមាន​យីហោ CR7​។ សណ្ឋាគារ​ទាំង​បួន ស្ថិតក្នុង ៣​ប្រទេស​ផ្សេងៗ​គ្នា ដែល​ពាក់ព័ន្ធ​នឹង​ជីវិត​របស់ Ronaldo ផ្ទាល់ គឺ​នៅ ក្រុង Funchal ជា​ភូមិកំណើត​, ក្រុង Lisbon ជា​កន្លែង​ចាប់ផ្តើម​អាជីព​បាល់ទាត់​, ក្រុង Madrid ជា​កន្លែង​អាជីព​បច្ចុប្បន្ន និង​ក្រុង New York ជា​កន្លែង​ដែល​លោក​ចង់​ទៅលេង Major League Soccer​។​

​សណ្ឋាគារ​ទីមួយ​របស់លោក គ្រោង​នឹង​បើក​នៅ​ឆ្នាំ ២០១៦ ក្នុង Madeira ឯ​ទី​ពីរ គ្រោង​នឹង​បើក​នៅ Lisbon នៅ​ចុងឆ្នាំ ២០១៦ ចំនែកឯ​ទី​បី បើក​នៅ Madrid ក្នុង​ឆ្នាំ ២០១៧ និង​ចុងក្រោយ​គេ បើក​នៅ New York ក្នុង​ឆ្នាំ ២០១៧​ដដែល​។​

Cristiano Ronaldo បានធ្វើការ​សម្រេចចិត្ត​បោះទុន​នេះ ក៏​ដោយសារតែ​លោក​រូប មិនអាច​ធ្វើជា​តារាបាល់ទាត់​របស់​ក្រុម Real Madrid បាន​រហូត​អស់​មួយជីវិត​នោះទេ ហើយ​វា​ជា​ក្តី​សុ​បិ​ន្ត​របស់លោក ដែល​តែងតែ​ចង់បាន​សណ្ឋាគារ​ផ្ទាល់ខ្លួន​។ លោក​ក៏បាន​លើកឡើង​ដែរ​ថា “​ការងារ​របស់ខ្ញុំ គឺ​លេង​បាល់ទាត់ តែ​ជីវិត​របស់ខ្ញុំ គឺ​មិនមែន​ដូចនេះ​រហូត​នោះទេ​”​។​

​ម្យ៉ាងវិញទៀត លោក​ក៏បាន​ជួបពិភាក្សា​ជាមួយ លោក Dionisio Pestana ដែល​លោក​ចាត់ទុកថា ជា​ដៃគូ​ពាណិជ្ជកម្ម​ដ៏​ល្អ ព្រោះ Cristiano Ronaldo និយាយថា លោក​ពូកែ​លេខ​មួយ​ក្នុង​វិស័យ​កីឡាបាល់ទាត់ ឯ​លោក Dionisio ពូកែ​លេខ​មួយ​ខាង​សណ្ឋាគារ​។​

Cristiano Ronaldo ក៏​បង្ហាញ​ពី​ភាព​ជឿជាក់ថា សណ្ឋាគារ​របស់គាត់​នឹង​ទទួលបាន​ជោគជ័យ ព្រោះតែ​កិត្តិនាម​ដ៏​ល្បីល្បាញ មហិច្ឆតា​របស់គាត់ និង​មហិច្ឆតា​របស់ Dionisio ហើយ​លោក​មាន​គ្រឿងផ្សំ​គ្រប់គ្រាន់​ហើយ​ដើម្បី​ធ្វើ​វា​។​

​យោងតាម​ប្រភពព័ត៌មាន​កីឡា Goal បានដាក់​ចំណាត់ថ្នាក់​ឲ្យ Cristiano Ronaldo ជាប់​ជា​កីឡាករ​ដែលមាន​បំផុត​ប្រចាំឆ្នាំ ២០១៥​នេះ ដែលមាន​ទឹកប្រាក់​សរុប ២២៣​លាន​ដុល្លារ​អាមេរិក​៕

​ប្រភព​៖ BusinessCambodia

​